ҲАКИМ АБДУЛЛОҲИ РАҲНАМО

сиёсатшинос ва ходими ҷамъиятӣ

Ҳаким Абдуллоҳи Раҳнамо 10-уми марти соли 1971 таваллуд шуда, пас аз хатми мактаби миёна, давраҳои таҳсили олӣ ва такмили ихтисоси худро дар риштаҳои муҳандисӣ, сиёсатшиносӣ ва диншиносӣ дар кишварҳои Тоҷикистон, Эрон, ИМА ва Русия гузаронида, соли 2007 пас аз хатми аспирантураи Донишгоҳи миллии Тоҷикистон дар мавзӯи «Масъалаи ҳокимият дар равандҳои сиёсии Тоҷикистони муосир» аз рӯи ихтисоси сиёсатшиносӣ рисолаи илмӣ ҳимоя намудааст.

Солҳои 1999-2005 дар Дастгоҳи иҷроияи Президенти Ҷумҳурии Тоҷикистон кор карда, солҳои 2005-2021 дар Маркази тадқиқоти стратегии назди Президенти Ҷумҳурии Тоҷикистон дар вазифаҳои мутахассиси пешбар, сардори раёсатҳои таҳлил ва ояндабинии сиёсати дохилӣ ва хориҷӣ ва мушовири директор фаъолият намудааст. Солҳои 2021-2022 масъули бахши робитаҳои хориҷии Иттифоқи нависандагони Тоҷикистон фаъолият кардааст. Аз соли 2023 Директори Маркази тарғиби адабиёт ва фарҳанги миллии Иттифоқи нависандагони Тоҷикистон мебошад.

А. Раҳнамо муаллифи беш аз 20 китоби илмию таҳлилию оммавӣ, аз ҷумла китобҳои эътирофгаштае чун “Мавқеи Тоҷикистон: ё чаро Ҷумҳурии Тоҷикистон кишвари таҷовузгар нетс” (2023), “Дидгоҳи давлатмеҳвар” (2021), “Хатари гурӯҳҳои ифротгарои динӣ дар чист?” (2015, 2016 ва 2022), “Таҷрибаи сулҳи тоҷикон: ҷамъбасти назариявӣ” (2018), “Эмомалӣ Раҳмон- Пешвои миллат: ҷанбаҳои назарӣ ва амалии мавзӯъ” (2016), “Мавқеи ҳизбӣ ва мавқеи миллӣ” (2016), “Афғонистон ва Осиёи Марказӣ: хусусиятҳо ва дурнамои таъсирпазирӣ” (2015), “Муқаддимае бар тафаккури давлатӣ” (2012), “Ислом ва амнияти миллӣ дар Тоҷикистон” (2010), “Уламои исломӣ дар Тоҷикистон” (2009), “Ҳизби динӣ ва давлати дунявӣ” (2008) ва ҳамчунин, муаллифи беш аз 100 мақолаи илмию таҳлилӣ дар масъалаҳои сиёсӣ, фарҳангӣ, динӣ ва байналмилалӣ мебошад ва навиштаҳои ӯ илова бар Тоҷикистон, дар нашрияҳои илмии кишварҳои Русия, ИМА, Чин, Олмон, Британия, Шветсария, Шветсия, Эрон, Индонезия, Туркия, Украина, Қазоқистон, Ӯзбекистон, Қирғизистон ва ғайра ба чоп расидаанд.