ҲАҚИҚАТЕ БОЛОТАР

Мо хастаем байни ҳақиқат ва маслиҳат,

Сарбастаем байни ҳақиқат ва маслиҳат.

                           ***

Як сӯ салоҳи миллату як сӯй нақди ом,

Биншастаем байни ҳақиқат ва маслиҳат.

                           ***

То ин булури ваҳдати якдона нашканад,

Бишкастаем байни ҳақиқат ва маслиҳат.

                          ***

Аз бими он, ки мулк пароканда мешавад,

Пайвастаем байни ҳақиқат ва маслиҳат.

                           ***

Як тифл ҷор зад, ки «падар нос мекашад!»…

Оҳистаем байни ҳақиқат ва маслиҳат.

                           ***

Эҳсос агар ба банди хирад нест, оташ аст,

Вобастаем байни ҳақиқат ва маслиҳат.

                           ***

Ин масти фош гуфтану он сархуши сукут,

Бигристаем байни ҳақиқат ва маслиҳат.

                          ***

Мо ҳар чӣ гуфтаем, ба тадбир гуфтаем,

Барҷастаем байни ҳақиқат ва маслиҳат.

                         ***

Болотарин ҳақиқати мо ҳифзи Меҳан аст,

Якдастаем байни ҳақиқат ва маслиҳат

                         ***

“Бори гуҳар намекашад ин тор нозук аст”,

Нагсастаем байни ҳақиқат ва маслиҳат.

                        ***

Не суд бурдаему на мансаб гирифтаем,

Ворастаем байни ҳақиқат ва маслиҳат.

 231 – Мақоларо хонданд,  1 – Имрӯз хонданд