АЙНӢ ВА ДАВЛАТ: СОЛИ 1937

Бо рӯҳи пурифтихор давлат гуфтам,

Дар хилвату ошкор давлат гуфтам.

Ҳарчанд ҳазор бор дидам ҷабраш,

Ман боз ҳазор бор давлат гуфтам.

                       ***

Ман ҷилди шиносномаро мебӯсам,

Ҳар сафҳаи “Шоҳнома”-ро мебусам.

Чун бинвисам калимаи “давлат”-ро,

Аз шиддати меҳр хомаро мебӯсам.

                      ***

Гар дарк шавад китоби давлатмеҳвар,

Андешаву тарҳи ноби давлатмеҳвар.

Ин халқи ҳазорпора миллат гардад,

Дар сояи офтоби давлатмеҳвар.

                     ***

Кофӣ набувад шиори давлатдорӣ,

Дарёб низоми кори давлатдорӣ.

Аз зинаи устувори миллатсозӣ,

То мактаби пойдори давлатдорӣ.

                     ***

Ҳарчанд, ки хайрхоҳи давлат будам,

Ҳарчанд чароғи роҳи давлат будам.

Аз рӯи сиёҳи чанд мансабдоре,

Дар рӯйхати сиёҳи давлат будам.

                     ***

Некахтару некфол давлат дорам,

Пирӯзу хуҷастабол давлат дорам.

Армони ҳазорсолаам ҳосил шуд,

Ман баъди ҳазор сол давлат дорам.

                                   Душанбе, 2017

 173 – Мақоларо хонданд,  1 – Имрӯз хонданд